ଶେଷ ହେଲା କୋଣାର୍କ ନାଟ୍ୟ ମଣ୍ଡପରେ ଚାଲିଥିବା ପାଞ୍ଚଦିନିଆ ଝୁଲଣ ଉତ୍ସବ

କୋଣାର୍କ: ବିଶ୍ବପ୍ରସିଦ୍ଧ କୋଣାର୍କ ମନ୍ଦିର ନିକଟରେ ଥିବା କୋଣାର୍କ ନାଟ୍ୟ ମଣ୍ଡପରେ ଆୟୋଜିତ ଝୁଲଣ ଉତ୍ସବ ଶେଷ ହୋଇଛି। ଗତକାଲି ଶେଷ ସଂଧ୍ୟାରେ ମୁଖ୍ୟ ଆକର୍ଷଣ ଥିଲା ଓଡିଶୀ, ଭାରତନାଟ୍ୟମ ସହିତ କଥକ। ଏହି ଶାସ୍ତ୍ରୀୟ ନୃତ୍ୟରେ ଝୁମି ଉଠିଥିଲା କୋଣାର୍କ ନାଟ୍ୟ ମଣ୍ଡପ।

ଶେଷ ସଂଧ୍ୟାର ପ୍ରଥମ ନୃତ୍ୟ ଥିଲା ଓଡିଶୀ। ଯାହାକୁ ପରିବେଷଣ କରିଥିଲେ ନୃତ୍ୟଶିଳ୍ପୀ ଜଗଜିତ ଦାସ। ସେ ଓଡିଶୀରେ ଅଭିନୟରେ ମା ଯୋଶଦାଙ୍କ କୃଷ୍ଣଙ୍କ ପ୍ରତି ଥିବା ସ୍ନେହକୁ ନୃତ୍ୟରୂପ ଦେଇଥିଲେ। ସେହିପରି ପୁନାର ମଧୁରା ଦେସପାଣ୍ଡେଙ୍କ କଥକ ମଧ୍ୟ ବେଶ ଉଚ୍ଚକୋଟିର ହୋଇଥିଲା। ଶେଷରେ ପରିବେଷଣ ହୋଇଥିଲା ଭାରତନାଟ୍ୟମ। କୋଲକାତାର ନୃତ୍ୟଶିଳ୍ପୀ ରାଜା ଦତ୍ତ ଏବଂ ଶ୍ରୀମତୀ ଛତ୍ୟା ଘୋଷ ଦଶାବତାର ଓ ଗୀତଗୋବିନ୍ଦକୁ ନୃତ୍ୟ ରୂପ ଦେଇଥିଲେ।

ଶେଷ ସଂଧ୍ୟାରେ ଅତିଥୀ ଭାବେ ସମାଜସେବୀ ରୋଜାଲୀନ ପାଟ୍ଟଶାଣୀ ମିଶ୍ର, ସଂଗୀତଜ୍ଞ ଲକ୍ଷ୍ମୀକାନ୍ତ ପାଲିତ, ପର୍ଯ୍ୟଟନ ବିଭାଗର ପୂର୍ବତନ ସହ ନିର୍ଦ୍ଦେଶକ ବିରଞ୍ଚି ମିଶ୍ର ଏବଂ ପ୍ରଖ୍ୟାତ ଓଡିଶୀ ନୃତ୍ୟଶିଳ୍ପୀ କବିତା ଦ୍ବିବେଦୀ ଯୋଗ ଦେଇଥିଲେ। ଏହି ଉତ୍ସବକୁ ପରିଚାଳନା କରିଥିଲେ ସ୍ବର୍ଗତ ଗୁରୁ ଗଙ୍ଗାଧର ପ୍ରଧାନଙ୍କ ସୁପୁତ୍ର ତଥା ନାଟ୍ୟମଣ୍ଡପର ସଂପାଦକ ଶିବାଶିଷ ପ୍ରଧାନ।