କୃଷ୍ଣ ବୁଣିଲେ କଳିମଞ୍ଜି !

ଭୁବନେଶ୍ୱର : କୃଷ୍ଣ ଯେଉଁଠି କଳି ସେଇଠି । ଏହା ମହାଭାରତ ସମୟରୁ ଆରମ୍ଭ ହୋଇଛି । ମହାଭାରତ ଯୁଦ୍ଧ ପାଇଁ କୃଷ୍ଣଙ୍କୁ କଳିର ମଞ୍ଜି ବୋଲି ସାଧାରଣ ଲୋକମତରେ କୁହାଯାଇଥାଏ । କିନ୍ତୁ ବର୍ତ୍ତମାନ ରାଜ୍ୟ ରାଜନୀତିରେ କଳିମଞ୍ଜି ବୁଣୁଛନ୍ତି କୃଷ୍ଣ । ଏ କୃଷ୍ଣ ଅନ୍ୟ କେହି ନୁହନ୍ତି କୋରାପୁଟର ପୂର୍ବତନ ବିଧାୟକ କୃଷ୍ଣଚନ୍ଦ୍ର ସଗରିଆ । ନିକଟରେ ବିଧାୟକ ପଦରୁ ଇସ୍ତଫା ଦେଇଥିବା କୃଷ୍ଣଚନ୍ଦ୍ର ବିରୋଧୀ ଦଳ ନେତା ତଥା ବରିଷ୍ଠ କଂଗ୍ରେସ ନେତା ନରସିଂହ ମିଶ୍ରଙ୍କ ବିରୋଧରେ ଆଣିଛନ୍ତି ଶାଣିତ ଅଭିଯୋଗ । ବିରୋଧୀ ଦଳ ନେତା ଭାବେ ନରସିଂହ ମିଶ୍ର ଦାୟିତ୍ୱ ନିର୍ବାହ ନ କରି ନବୀନଙ୍କ ସହ ଭିତିର ବୁଝାମଣା କରିଛନ୍ତି ବୋଲି ଅଭିଯୋଗ କରିବାକୁ ପଛାଇ ନାହାନ୍ତି । ଯେଉଁ କୁନ୍ଦୁଲି ଗଣଦୁଷ୍କର୍ମ ଘଟଣାରେ ନରସିଂହ ବିଧାନସଭାରେ ସ୍ୱର ଉଠାଇବାକୁ ପଛଘୁଞ୍ଚା ଦେଇଥିଲେ, ଏପରିକି ଆଦିବାସୀମାନଙ୍କ ସ୍ୱାର୍ଥରକ୍ଷା ପାଇଁ ମୁଖ୍ୟମନ୍ତ୍ରୀଙ୍କ ପାଦତଳେ ବିଧାନସଭାରେ ପଡିଥିଲେ ମଧ୍ୟ ନରସିଂହ ଏଥିରେ ସହମତି ପ୍ରକାଶ କରି ନ ଥିଲେ । କିନ୍ତୁ କୁନ୍ଦୁଲି ଗଣଦୁଷ୍କର୍ମ ଘଟଣାରେ ଆତ୍ମହତ୍ୟା କରିଥିବା ଆଦିବାସୀ ବାଳିକା ପାଇଁ ରାଜ୍ୟ ସରକାର ନ୍ୟାୟ ଦେଇ ନ ଥିବାରୁ କୃଷ୍ଣଚନ୍ଦ୍ର ବିଧାୟକ ପଦରୁ ଇସ୍ତଫା ଦେଇଛନ୍ତି ବୋଲି କହିଥିଲେ । କିନ୍ତୁ କୃଷ୍ଣଚନ୍ଦ୍ରଙ୍କ ଏଭଳି ଅଭିଯୋଗ ପରେ କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତି ଏହା ପୂର୍ବତନ କେନ୍ଦ୍ରମନ୍ତ୍ରୀ ତଥା କଂଗ୍ରେସ ନେତା ଶ୍ରୀକାନ୍ତଙ୍କ ଚକ୍ରାନ୍ତ ବୋଲି ଅଭିଯୋଗ ବାଢ଼ିଛନ୍ତି । ତାରାବାହିନୀପତି ଶ୍ରୀକାନ୍ତଙ୍କୁ ଘରଭଙ୍ଗା ନେତା ଭାବେ ବର୍ଣ୍ଣନା କରିବାକୁ ପଛାଇ ନାହାନ୍ତି । ଶ୍ରୀକାନ୍ତ କୃଷ୍ଣଙ୍କୁ ମୋହରା କରି କଂଗ୍ରେସ ଘର ଭାଙ୍ଗିବାକୁ ଉଦ୍ୟମ କରିଛନ୍ତି । କୃଷ୍ଣଚନ୍ଦ୍ରଙ୍କ ଇସ୍ତଫା ଯୋଗୁଁ ନରସିଂହ ବିରୋଧୀ ଦଳ ନେତାର ମାନ୍ୟତା ହରାଇବେ ବୋଲି ଶ୍ରୀକାନ୍ତ ଯୋଜନା କରିଥିଲେ । କିନ୍ତୁ ସମତାକ୍ରାନ୍ତି ବିଧାୟକ ଜର୍ଜ ତିର୍କୀ କଂଗ୍ରେସରେ ଯୋଗ ଦେବା ପରେ ନରସିଂହଙ୍କ ବିରୋଧୀ ଦଳ ନେତାପଦ କାଏମ ରହିଥିଲା । କଂଗ୍ରେସ କିଛିଦିନ ହେବ ବିବାଦରୁ ମୁକ୍ତ ପାଇଥିବାବେଳେ ବର୍ତ୍ତମାନ କୃଷ୍ଣ କଳିମଞ୍ଜି ପୋତିଛନ୍ତି ବୋଲି ରାଜନୈତିକ ମହଲରେ ଜୋର୍ଦାର ଚର୍ଚ୍ଚାର ପ୍ରସଙ୍ଗ ହୋଇଛି ।