ବିଦେଶରୁ ଦିଲ୍ଲୀରେ ପହଞ୍ଚିଲେ ସୁଦ୍ଧା ଘରକୁ ଫେରିଲାନି ପୁଅ: ବାଲୁଗାଁ ଥାନାରେ ଏତଲା ଦେଲେ ବାପା

ବାଲୁଗାଁ (ସୀତାରାମ ଅଗ୍ରୱାଲ): ପରିବାର ପୋଷଣ ପାଇଁ ଦୀର୍ଘ ତିନି ବର୍ଷ ଧରି ବିଦେଶରେ କାର୍ଯ୍ୟରତ ଓଡ଼ିଆ ଶ୍ରମିକ ନିଜ ଘରକୁ ଫେରିବା ନେଇ ଜଣାଇଥିଲେ ସୁଦ୍ଧା ଅଦ୍ୟାବଧି ଘରେ ନପହଞ୍ଚିବା ଯୋଗୁଁ ପରିବାର ବର୍ଗ ବ୍ୟତିବ୍ୟସ୍ତ ହୋଇପଡିଛନ୍ତି।

ଖବର ମୁତାବକ ବାଲୁଗାଁ ଥାନା ଅନ୍ତର୍ଗତ ବେଲପଡା ଗ୍ରାମର ଅକ୍ଷୟ ସ୍ୱାଇଁଙ୍କ ପୁଅ ରଞ୍ଜନ ସ୍ୱାଇଁ (୩୦) ଦୀର୍ଘ ତିନି ବର୍ଷ ଧରି ଆବୁଧାବିରେ ଏକ ଘରୋଇ କମ୍ପାନୀରେ କାର୍ଯ୍ୟ କରି ଆସୁଥିଲା। ଗତ ୧୮ ତାରିଖରେ ଉକ୍ତ କମ୍ପାନୀରୁ ଛୁଟି ନେଇ ରଞ୍ଜନ ନିଜ ଘରକୁ ଆସୁଥିବା ସମ୍ପର୍କରେ ପରିବାରକୁ ଫୋନ ଯୋଗେ କହିଥିଲେ। ବିମାନ ଯୋଗେ ଆବୁଧାବିରୁ ମୁମ୍ବାଇ ତାପରେ ଦିଲ୍ଲୀ ପହଁଚିବା ପର୍ଯ୍ୟନ୍ତ ପୁଅ ସହ ଫୋନରେ ଯୋଗାଯୋଗ ହୋଇଥିବା ବେଳେ ସପ୍ତାହେ ବିତିଯାଇଥିଲେ ସୁଦ୍ଧା ଅଦ୍ୟାବଧି ପୁଅ ରଞ୍ଜନ ଘରକୁ ଫେରି ନଥିବା ବେଳେ କୌଣସି ଯୋଗାଯୋଗ ମଧ୍ୟ ହୋଇପାରୁନାହିଁ। ଯାହାଫଳରେ ପରିବାର ଲୋକେ ବ୍ୟତିବ୍ୟସ୍ତ ହୋଇଥିବା ବେଳେ ନାନା ଦୁଶ୍ଚିନ୍ତାରେ ରହିଛନ୍ତି।

ଏନେଇ ରଞ୍ଜନଙ୍କ ବାପା ଅକ୍ଷୟ ସ୍ୱାଇଁ ଥାନାରେ ଅଭିଯୋଗ କରିଛନ୍ତି। ଏତଲାକୁ ଗୁରୁତର ସହ ନେଇ ପୋଲିସ ପକ୍ଷରୁ ତଦନ୍ତ ଜାରି ରଖିଥିବା ଥାନାଧିକାରୀ ଜୟ ପ୍ରକାଶ ପରିଡା କହିଛନ୍ତି।