ବିଜ୍ଞାନ ଯୁଗରେ ବି ହଟୁନି ଅନ୍ଧବିଶ୍ଵାସ: ଗୁଣିଆ ପାଇଁ ଅନୁମତି ମାଗିବାକୁ ଥାନାରେ ଗ୍ରାମବାସୀ

ମାନସ ପୂର୍ଣ୍ଣ ଆଚାର୍ଯ୍ୟ

ଆସିକା: ବିଜ୍ଞାନ ଯୁଗରେ ବି ହଟୁନି ଅନ୍ଧ ବିଶ୍ବାସ। ସଚେତନତା ସୃଷ୍ଟି ଉଦ୍ଦେଶ୍ୟରେ ସରକାର କୋଟି କୋଟି ଟଙ୍କା ପାଣି ଭଳି ଖର୍ଚ୍ଚ କରୁଛନ୍ତି। ହେଲେ ଏସବୁ ସଚେତନତାର ବାର୍ତ୍ତା ଅସଲ ବେଳକୁ କାମରେ ଆସୁନି। ଆଉ ଅନ୍ଧବିଶ୍ୱାସର ବଶବର୍ତ୍ତୀ ମଣିଷ ଶେଷରେ ଗୁଣି ଗାରେଡ଼ି ସନ୍ଦେହରେ ଅନେକ କିଛି ଅପ୍ରୀତିକର ପରିସ୍ଥିତି ସୃଷ୍ଟି କରୁଛି। ଏଭଳି ଏକ ଅଭାବନୀୟ ଘଟଣା ଆଜି ଗଞ୍ଜାମ ଜିଲ୍ଲାର ଆସିକା କୋଟିନଡା ଥାନା ପରିସରରେ ଦେଖିବାକୁ ମିଳିଛି।

କୋଟିନଡା ଗ୍ରାମର ଗନ୍ଧର୍ବ ମହାନ୍ତିଙ୍କ ପରିବାରର ୩ ଜଣଙ୍କୁ ଏକା ବେଳକେ ଭୂତ ସବାର ହୋଇଛି। ଗ୍ରାମବାସୀ ମାନେ କୋଟିନଡା ଥାନା ଆଗରେ ସଂପୃକ୍ତ ବ୍ୟକ୍ତିମାନଙ୍କ ଶରୀରକୁ ଭୂତ ଆସିଥିବା ଓ ସେମାନେ ବିଭିନ୍ନ ପ୍ରକାର ଚିତ୍କାର କରୁଥିବା ଉଲ୍ଲେଖ କରିଛନ୍ତି। ଏଥି ସହିତ ଗ୍ରାମବାସୀମାନେ କୋଟିନଡା ଥାନାକୁ ଆସି ଗାଁ ରେ ସର୍ବଦା ଏଭଳି ଅଭାବନୀୟ ଘଟଣା ଲାଗି ରହୁଥିବାରୁ ତୁରନ୍ତ ଗୁଣିଆ ଆଣିବା ସହ ଗାଁ ରୁ ଗୁଣିଆକୁ ଖୋଜି ବାହାର କରିବାକୁ ଥାନା ଅଧିକାରୀଙ୍କୁ ଅନୁମତି ଦେବାକୁ ଦାବି କରୁଛନ୍ତି।

ଶେଷରେ ଆସିକା ଏସଡିପିଓ ଉମାଶଙ୍କର ସିଂ ଘଟଣାସ୍ଥଳରେ ପହଞ୍ଚି ଲୋକଙ୍କୁ ବୁଝାସୁଝା କରିଥିଲେ ମଧ୍ୟ ଏବେବି ସେଠାରେ ଉତ୍ତେଜନା ଲାଗି ରହିଛି।