ଲକ୍ଷ୍ମୌରେ ସୁପରଷ୍ଟାର ରଜନୀକାନ୍ତ, ମୁଖ୍ୟମନ୍ତ୍ରୀ ଆଦିତ୍ୟନାଥଙ୍କ ସହ ଦେଖିବେ ଫିଲ୍ମ ‘ଜେଲର’

ନୂଆଦିଲ୍ଲୀ: ପ୍ରତିଷ୍ଠିତ ଅଭିନେତା ରଜନୀକାନ୍ତ ଶୁକ୍ରବାର ସନ୍ଧ୍ୟାରେ ଲକ୍ଷ୍ନୌରେ ପହଞ୍ଚିଛନ୍ତି। ସାମ୍ବାଦିକମାନଙ୍କ ସେ କହିଛନ୍ତି ଯେ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ସହ ସେ ତାଙ୍କ ଫିଲ୍ମ ‘ଜେଲର’ ଦେଖିବେ। ତାଙ୍କ ଫିଲ୍ମ ଜେଲର ବର୍ତ୍ତମାନ ଦେଶରେ ବେଶ ସଫଳତା ହାସଲ କରିଛି। ଏ ନେଇ ସେ କହିଛନ୍ତି ଯେ, ଭଗବାନଙ୍କ କୃପାରୁ ଏହି ସଫଳତା ମିଳିଛି।

ସୁପରଷ୍ଟାର ରଜନୀକାନ୍ତ ୟୁପିରେ ତିନି ଦିନ ରହିବେ। ସେ ଅଗଷ୍ଟ ୧୮ ରୁ ୨୦ ତାରିଖ ପର୍ଯ୍ୟନ୍ତ ୟୁପିରେ ରହିବେ। ଏହି ସମୟରେ ସେ ଅଯୋଧ୍ୟା, କାଶୀ ଏବଂ ମଥୁରା ମନ୍ଦିରରେ ଠାକୁରଙ୍କୁ ଦର୍ଶନ କରିବେ। କିଛିଦିନ ଧରି ସୁପରଷ୍ଟାର ରଜନୀକାନ୍ତ କ୍ରମାଗତ ଭାବରେ  ବିଭିନ୍ନ ରାଜ୍ୟର ଧାର୍ମିକ ସ୍ଥାନ ଭ୍ରମଣ କରିବାରେ ଲାଗିଛନ୍ତି।

ଗତ ୧୨ ଅଗଷ୍ଟ ଶନିବାର ଦିନ ସେ ବଦ୍ରିନାଥ ଧାମ ପରିଦର୍ଶନ କରିଥିଲେ। ପରଦିନ ସେ ଗଣେଶ ଗୁମ୍ଫା, ଭାୟ ଗୁମ୍ଫା, ମାନା ଗ୍ରାମ ଏବଂ ସରସ୍ୱତୀ ମନ୍ଦିର ପରିଦର୍ଶନ କରିଥିଲେ। ଏହା ପରେ, ଅଗଷ୍ଟ ୧୫ ମଙ୍ଗଳବାର ଦିନ ସେ ଆଧ୍ୟାତ୍ମିକ ଭ୍ରମଣରେ ରାଞ୍ଚିରେ ପହଞ୍ଚିଥିଲେ। ଯୋଗ ସତ୍ତାଙ୍ଗ ଆଶ୍ରମରେ ଧ୍ୟାନ କରିବା ସହିତ ସେ ସିଦ୍ଧପୀତ ରାଜାରପ୍ପା ମନ୍ଦିରରେ ପ୍ରାର୍ଥନା କରିଥିଲେ।

ରଜନୀକାନ୍ତଙ୍କ ଫିଲ୍ମ ‘ଜେଲର’ ବର୍ତ୍ତମାନ ବକ୍ସ ଅଫିସରେ ଧୂମ ମଚାଉଛି। ଥାଲାଇଭା ଷ୍ଟାରର ଜେଲର ସାରା ବିଶ୍ୱରେ ଚହଳ ସୃଷ୍ଟି କରିଛି। ରଜନୀକାନ୍ତଙ୍କ ଅଭିନୀତ ଏହି ଚଳଚ୍ଚିତ୍ର ସାରା ବିଶ୍ୱରେ ୪୧୧ କୋଟି ରୋଜଗାର କରିଥିବା ବେଳେ ଭାରତର ମୋଟ ୨୬୪ କୋଟି ଆୟ କରିଛି। ଏହି ଚଳଚ୍ଚିତ୍ର ବିଶ୍ବ ତାମିଲ ଚଳଚ୍ଚିତ୍ରରେ ତୃତୀୟ ସର୍ବାଧିକ ଆୟ କରିଥିବା ଚଳଚ୍ଚିତ୍ର ହୋଇପାରିଛି।