ଓୟୁଏଟିର‌ ଭିତ୍ତିଭୂମି ପ୍ରକଳ୍ପର ଉଚ୍ଚ ସ୍ତରୀୟ ସମୀକ୍ଷା ବୈଠକ: ଯୋଗଦେଲେ ଉପ-ମୁଖ୍ୟମନ୍ତ୍ରୀ, ଆଇନ ମନ୍ତ୍ରୀ

ଭୁବନେଶ୍ବର: ଆଜି କୃଷିଭବନ ଠାରେ ଉପ-ମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂହଦେଓଙ୍କ ଉପସ୍ଥିତିରେ ଆଇନ, ପୂର୍ତ୍ତ‌ ଓ ଅବକାରୀ ମନ୍ତ୍ରୀ ପୃଥ୍ୱୀରାଜ ହରିଚ଼ନ୍ଦନ କାର୍ଯ୍ୟନିର୍ବାହୀ ସଂସ୍ଥା ସହିତ ଓୟୁଏଟିର‌ ଭିତ୍ତିଭୂମି ପ୍ରକଳ୍ପର ଏକ ଉଚ୍ଚ ସ୍ତରୀୟ ସମୀକ୍ଷା ବୈଠକରେ ଯୋଗଦେଇ ବିଭିନ୍ନ ବିଷୟରେ ପୁଙ୍ଖାନୁପୁଙ୍ଖ ଆଲୋଚନା କରିଥିଲେ।

ଏହି ବୈଠକରେ ଓୟୁଏଟି ପରିସରରେ ନିର୍ମାଣଧିନ ୫୦୦ ସିଟ୍ ବିଶିଷ୍ଟ ଛାତ୍ର ନିବାସ, ନିର୍ମାଣଧିନ ୨୦୦ ସିଟ୍ ବିଶିଷ୍ଟ ଶ୍ରମିକ ନିବାସ ନିର୍ମାଣ, ଛାତ୍ରୀ ନିବାସର ୧୦ ଟା କୋଠରୀର ନବୀକରଣ, ନିର୍ମାଣଧିନ ପ୍ରଶାସନିକ ଭବନ, ନିର୍ମାଣଧିନ ଚ଼ିପିଲିମା ଠାରେ କଲେଜ୍ ଅଫ୍ ଏଗ୍ରିକଲ୍ଟଚ଼ର ଠାରେ ହୋଇଥିବା ୫୦୦ ସିଟ୍ ବିଶିଷ୍ଟ ଅଡିଟୋରିୟମ ହଲ୍ ଆଦିର ସ୍ଥିତି ବିଷୟରେ କାର୍ଯ୍ୟନିର୍ବାହୀ ସଂସ୍ଥାର ଅଧିକାରୀ ମାନେ ଅବଗତ କରାଇଥିଲେ। ଚାଲୁଥିବା ସମସ୍ତ କାର୍ଯ୍ୟକୁ ସମାପ୍ତ କରି ଖୁବଶୀଘ୍ର ହସ୍ତାନ୍ତର କରିବାପାଇଁ କାର୍ଯ୍ୟନିର୍ବାହୀ ସଂସ୍ଥାକୁ ନିର୍ଦ୍ଦେଶ‌ ଦିଆଯାଇଥିଲା।

ଏହି ବୈଠକରେ କୃଷି ଓ କୃଷକ ସଶକ୍ତିକରଣ ବିଭାଗର ପ୍ରମୁଖ ଶାସନ ସଚିବ ଅରବିନ୍ଦ ପାଢ଼ୀ, ଆରକ୍ଷୀ ମହାନିର୍ଦ୍ଦେଶକ (ଅତ୍ୟାଧୁନିକରଣ) ସୌମେନ୍ଦ୍ର ପ୍ରିୟଦର୍ଶୀ, ଓୟୁଏଟି କୁଳପତି ପ୍ରଫେସର ଡକ୍ଟର ପ୍ରଭାତ କୁମାର ରାଉଳଙ୍କ ସମେତ ବିଭାଗୀୟ ଅଧିକାରୀ ମାନେ ଉପସ୍ଥିତ ଥିଲେ।