ଓଡିଶା ଅଣ ଗେଜଟେଡ୍‌ ବନସେବା ସଂଘର ସାଧାରଣ ପରିଷଦ ବୈଠକରେ ଯୋଗ ଦେଲେ କେନ୍ଦ୍ର ଶିକ୍ଷା ମନ୍ତ୍ରୀ

ଭୁବନେଶ୍ଵର: କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ସମ୍ବଲପୁରରେ ଓଡିଶା ଅଣ ଗେଜଟେଡ୍‌ ବନସେବା ସଂଘର ସାଧାରଣ ପରିଷଦ ବୈଠକରେ ଅତିଥି ଭାବେ ଯୋଗ ଦେଇଛନ୍ତି। ଏହି ଅବସରରେ ସେ କହିଛନ୍ତି, ରାଜ୍ୟର ବନାଞ୍ଚଳ ସୁରକ୍ଷାରେ ବନ କର୍ମଚାରୀଙ୍କର ଗୁରୁତ୍ବପୂର୍ଣ୍ଣ ଭୂମିକା ରହିଛି। ଜଙ୍ଗଲ କ୍ଷେତ୍ରଫଳ ଦୃଷ୍ଟିରୁ ଓଡିଶା ସାରା ଦେଶରେ ଦ୍ବିତୀୟ ସ୍ଥାନରେ ରହିଛି। ବନ କର୍ମଚାରୀମାନେ ଜଙ୍ଗଲ ସୁରକ୍ଷାରେ ନିଷ୍ଠାର ସହ କାର୍ଯ୍ୟ କରୁଥିବାରୁ ରାଜ୍ୟର ଜଙ୍ଗଲ ଘନତ୍ବକୁ ସୁରକ୍ଷା ଦେବା ସମ୍ଭବ ହୋଇପାରିଛି।

ଶ୍ରୀ ପ୍ରଧାନ ଆହୁରି କହିଛନ୍ତି, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ବରେ ଭାରତ ୨୦୭୦ ସୁଦ୍ଧା ଅଙ୍ଗାରକାମ୍ଳମୁକ୍ତ ରାଷ୍ଟ୍ର ହେବାର ସଂକଳ୍ପ ନେଇ ଆଗକୁ ବଢୁଛି । ଗତ ଜୁନ ମାସରେ ପ୍ରଧାନମନ୍ତ୍ରୀଙ୍କ ଦ୍ବାରା ଏକ ଅଭିନବ କାର୍ଯ୍ୟକ୍ରମ – ଏକ ପେଡ ମାଆ କେ ନାମ ଆରମ୍ଭ କରାଯାଇଛି। ଏହା ଭବିଷ୍ୟତ ପିଢି ପାଇଁ ଜଙ୍ଗଲ ସୃଷ୍ଟି ଓ ପରିବେଶ ସୁରକ୍ଷାରେ ବେଶ ସହାୟକ ହୋଇଛି ବୋଲି ଶ୍ରୀ ପ୍ରଧାନ କହିଛନ୍ତି। ପରିବେଶ ସନ୍ତୁଳନ ରକ୍ଷା କରିବା ସମସ୍ତଙ୍କ କର୍ତ୍ତବ୍ୟ ବୋଲି ଶ୍ରୀ ପ୍ରଧାନ ଏହି ଅବସରରେ କହିଥିଲେ।