କୁମ୍ବିଂ ଅପରେସନ ବେଳେ ମାଓବାଦୀଙ୍କ ବହୁ ବିସ୍ଫୋରକ ସାମଗ୍ରୀ ଜବତ 

ଭୁବନେଶ୍ଵର: ମାଲକାନଗିରି ଜିଲ୍ଲାର ସ୍ୱାଭିମାନ ଅଞ୍ଚଳ ଅନ୍ତର୍ଗତ ଯନ୍ତ୍ରୀ ବିଏସଏଫ କ୍ୟାମ୍ପର ବିଏସଏଫ ଯବାନ ଓ ସ୍ପେଶାଲ ଅପରେସନ ଟିମ ପକ୍ଷରୁ କୁମ୍ବିଂ ଅପରେସନ ବେଳେ ଗତକାଲି ଆରଲୀପଡ଼ା ଓ ତାବେର ଗ୍ରାମ ରାସ୍ତାରେ ମାଓବାଦୀଙ୍କ ବହୁ ବିସ୍ଫୋରକ ସାମଗ୍ରୀ ଓ ବ୍ୟବହୃତ ସାମଗ୍ରୀ ଜବତ କରାଯାଇଛି। ଗତ କିଛି ଦିନ ତଳେ ବିଏସଏଫ ର ରାୟପୁରସ୍ଥିତ ସ୍ୱତନ୍ତ୍ର ମହାନିର୍ଦେଶକ, ଓଡିଶା ବିଏସଏଫ ଆଇ. ଜି ଏବଂ ପୋଲିସ ମହାନିର୍ଦେଶକଙ୍କ ଗସ୍ତକୁ ଦୃଷ୍ଟିରେ ରଖି ବିଏସଏଫ ପକ୍ଷରୁ ଜିଲ୍ଲାର ବିଭିନ୍ନ ମାଓ ଉପଦ୍ରୁତ ଅଞ୍ଚଳରେ କୂମ୍ବିଂ ଅପରେସନ ଆରମ୍ଭ କରାଯାଇଥିଲା।

ଏହି ଅପରେସନ ବେଳେ ଆରଲୀପଡ଼ା ଓ ତାବେର ଗ୍ରାମ ରାସ୍ତାରେ ମାଓବାଦୀଙ୍କ ଦ୍ବାରା ମାଟି ତଳେ ପୋତା ଯାଇଥିବା ୫୬ ଟି ଜିଲେଟିନ ଷ୍ଟିକ, ୧୩ ଟି ଇଲେକ୍ଟ୍ରିକ ଡେଟୋନେଟର, ୩୦ ମିଟର କଡେ଼କ୍ସ ତାର, ୩୦ ମିଟର ଇଲେକ୍ଟ୍ରିକ ତାର, ଗୋଟିଏ ବ୍ୟାଟେରୀ, ଗୋଟିଏ ସିଡି, ୭ ଟି ମାଓବାଦୀଙ୍କ ପୁସ୍ତିକା ସମେତ ମୋଟ ୧୦ ପ୍ରକାରର ସାମଗ୍ରୀ ଜବତ କରାଯାଇଛି। ଏହାଦ୍ୱାରା ମାଓବାଦୀଙ୍କ ସମର୍ଥକଙ୍କ ମନୋବଳ ଭାଙ୍ଗିଥିବା ସହ ସଂପୃକ୍ତ ଅଂଚଳରେ ତଲାସୀ ଅଭିଯାନ ଜାରୀ ରହିଥିବା ବିଏସଏଫର ସେକ୍ଟର ହେଡକ୍ୱାଟର ପକ୍ଷରୁ ପ୍ରେସ ଇସ୍ତାହାରରେ ସୂଚନା ଦିଆଯାଇଛି।