ମା’ ସମଲେଇ ପ୍ରକଳ୍ପ ଉଦଘାଟନ ବେଳେ କାହିଁକି କାନ୍ଦିଲେ କାର୍ତ୍ତିକ ପାଣ୍ଡିଆନ

ଭୁବନେଶ୍ବର: ଶନିବାର ଦିନ ବେଶ ଭକ୍ତିପୂର୍ଣ୍ଣ ପରିବେଷ ମଧ୍ୟରେ ଉଦଘାଟିତ ହୋଇଛି ମା ସମଲେଇ ପ୍ରକଳ୍ପ। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହାକୁ ଉଦଘାଟନ କରିଥିଲେ। ହରିବୋଲ ହୁଳହୁଳି ଓ ଶଙ୍ଖ ଧ୍ବନୀରେ ପ୍ରକମ୍ପିତ ହୋଇଥିଲା ପ୍ରକଳ୍ପ ସ୍ଥାନ। ମୁଖ୍ୟମନ୍ତ୍ରୀ ପହଞ୍ଚିବା ପରେ ଲୋକଙ୍କ ମଧ୍ୟରେ ବେଶ ଉତ୍ସାହ ବୃଦ୍ଧି ପାଇଥିଲା।

ଏହି ପ୍ରକଳ୍ପ ହେଉଛି ମୁଖ୍ୟମନ୍ତ୍ରୀ ତଥା ନବୀନ ଓଡିଶା ଅଧ୍ୟକ୍ଷଙ୍କ ସ୍ବପ୍ନର ପ୍ରକଳ୍ପ। ଶ୍ରୀମନ୍ଦିର ପରିକ୍ରମା ପ୍ରକଳ୍ପର ଲୋକାର୍ପଣ ପରେ ମା ସମଲେଇ ପ୍ରକଳ୍ପ ହେଉଛି ଉଭୟଙ୍କର ଦ୍ବିତୀୟ ସ୍ବପ୍ନର ପ୍ରକଳ୍ପ। ତେବେ ଏହି ପ୍ରକଳ୍ପକୁ ନେଇ ଖୋଦ କାର୍ତ୍ତିକ ପାଣ୍ଡିଆନ କେତେ ଉତ୍ସାହିତ ଏବଂ ଖୁସି ସେହି ପ୍ରକଳ୍ପ ସ୍ଥାନରେ ତାହାର ପ୍ରମାଣ ମିଳିଥିଲା।

ପ୍ରକଳ୍ପ ଫଳକ ଉଦଘାଟନ ପରେ ମୁଖ୍ୟମନ୍ତ୍ରୀ ଚଉକିରେ ବସି ପୂଜିବିଧିକୁ ଅନୁଧ୍ୟାନ କରୁଥିଲେ। ସେ ଏକ ଚଉକିରେ ବସି ଥିବା ବେଳେ ପାଣ୍ଡିଆନ ତାଙ୍କ ପାଖରେ ଛିଡା ହୋଇଥିଲେ। ସେ ପୁରା ଭାବ ବିହ୍ବୋଳ ହୋଇ ଦେଖୁଥିଲେ ପ୍ରକଳ୍ପର ପୂଜାବିଧୀ। ହେଲେ କଣ ହେଲା କେଜାଣି ତାଙ୍କ ଆଖିରୁ ଖସି ଆସିଲା ଦୁଇ ଧାର ଲୁହ। ବେକରେ ଗୁଡେଇ ହୋଇଥିବା ମାଙ୍କ ଶାଢୀରେ ସେ ପୋଛିଲେ ତାଙ୍କର ଆଖିର ଲୁହ। ଏହି ଘଟଣା ହୁଏତ ସମସ୍ତଙ୍କ ଦୃଷ୍ଟି ଗୋଚର ହୋଇ ନ ଥିଲା। ହେଲେ କ୍ୟାମେରାରେ ତାହା କୈଦ ହୋଇଥିଲା।

ସେ ଲୁହ ପୋଛୁଥିବାର ଦୃଶ୍ୟ ଯେଉଁ କେତେଜଣ ଦେଖିଥିଲେ ସେମାନେ ସମସ୍ତେ ଆଶ୍ଚର୍ଯ୍ୟ ହୋଇଥିଲେ। ସେମାନେ ଅନୁଭବ କରିଥିଲେ ଯେ, ଏହି ପ୍ରକଳ୍ପର ପୂର୍ଣ୍ଣ ରୂପରେଖ ପାଇଁ ପାଣ୍ଡିଆନଙ୍କ ପରିଶ୍ରମ କଣ ଥିଲା। ଭୋରରୁ ଶୀତ କାକର, ବର୍ଷାକୁ ଖାତିରି ନ କରି ସେ ବାରମ୍ବାର ସମ୍ବଲପୁର ଗସ୍ତ କରି ଏହି ପ୍ରକଳ୍ପର କାର୍ଯ୍ୟକୁ ସିଧା ତଦାରଖ କରିଥିଲେ। ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶରେ ସେ ଏହି ପ୍ରକଳ୍ପର ସଫଳ ବିନ୍ଧାଣୀ ଭାବେ କାର୍ଯ୍ୟ କରିଥିଲେ।

ସେହି ପରିଶ୍ରମ ଯେତେବେଳେ ବାସ୍ତବ ରୂପ ନେଇଛି ସେତେବେଳେ ତାଙ୍କ ଆଖିର ଆସିଛି ଖୁସରି ଲୁହ, ଆନନ୍ଦର ଲୁହ ଆଉ ଭକ୍ତିର ଲୁହ। ସେହି ଖୁସିକୁ ସେ ଲୁଚାଇବା ପାଇଁ ଚେଷ୍ଠା କରିଥିଲେ ମଧ୍ୟ ତାହା ହୋଇ ନ ଥିଲା। କ୍ୟାମେରା ସାମାନାରେ ଆସିଲା ତାଙ୍କର ସେହି ଭକ୍ତର ଅଶ୍ରୁ।

ଓଡିଶାର ଦୁଇଟି ବଡ କାମ ଖୋଦ ପାଣ୍ଡିଆନଙ୍କ ପ୍ରତ୍ୟେକ୍ଷ ତତ୍ବାବଧାନରେ ବାସ୍ତବ ରୂପ ନେଇଛି। ସେ ଦୁଇଟି ହେଲା ଶ୍ରୀମନ୍ଦିର ପରିକ୍ରମା ପ୍ରକଳ୍ପ ଆଉ ମା ସମଲେଇ ପ୍ରକଳ୍ପ। ଏହି ଦୁଇ ପ୍ରକଳ୍ପ ବାସ୍ତବ ରୂପ ନେବା ପରେ ଆଜି ସାରା ଓଡିଶାର ଲୋକେ ତାଙ୍କର ପରିଶ୍ରମକୁ ଭୂୟସୀ ପ୍ରଶଂସା କରିବାରେ ଲାଗିଛନ୍ତି।