ଚିକିତ୍ସା ଅବହେଳାରୁ ରୋଗୀ ମୃତ୍ୟୁ ଘଟଣା, ୩ ଡାକ୍ତରଙ୍କ ନାମରେ ମାମଲା ରୁଜୁ

କୁଜଙ୍ଗ: କୁଜଙ୍ଗ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଗତକାଲି ରାତିରେ ଡାକ୍ତରଙ୍କ ତୃଟିପୂର୍ଣ୍ଣ ଚିକିତ୍ସା କାରଣରୁ ରୋଗୀର ମୃତ୍ୟୁ ଘଟଣା ଏବେ ରୋଚକ ମୋଡ ନେଇଛି। ଗତକାଲି ଏହି ଘଟଣାରେ ଅଭିଯୋଗ ଆଧାରରେ କାର୍ଯ୍ୟରତ ତିନିଜଣ ଡାକ୍ତରଙ୍କ ନାମରେ ମାମଲା ରୁଜୁ କରାଯାଇଛି। ଏହି ମାମଲାର ତଦ୍ଦନ୍ତ ଭାର ଗ୍ରହଣ କରିଛନ୍ତି ଖୋଦ ଥାନା ଅଧିକାରୀ ରଶ୍ମୀ ରଞ୍ଜନ ଦାଶ। ଅନ୍ୟ ପକ୍ଷରେ କୁଜଙ୍ଗ ମେଡିକାଲରେ ଏମବିବିଏସ ଡାକ୍ତର ଥିବା ସତ୍ୱେ ସେ କଣ ପାଇଁ ନିଜେ ରୋଗୀର ଚିକିତ୍ସା ନକରି ଆୟୂଷ ଡାକ୍ତରଙ୍କୁ ଏହି ଦାୟିତ୍ୱ ଦେଇ ନିଧଡ଼କ ଭାବେ ବସି ପଡିଥିଲେ ସେ ନେଇ ପ୍ରଶ୍ନ ଉଠୁଛି। ସେହିପରିଭାବେ ତୃଟିପୂର୍ଣ୍ଣ ଚିକିତ୍ସା ଯୋଗୁ ରୋଗୀର ମୃତ୍ୟୁ ହେବା ଜାଣିବାପରେ ମଧ୍ୟ ରୋଗୀଙ୍କ ସମ୍ପର୍କୀୟଙ୍କ ହାତରୁ ପରାମର୍ଶ ଚିଠା ନେଇ ତୁରନ୍ତ କଟକ ରେଫର କରିବା ଆଜି ଘଟଣାକୁ କୁଜଙ୍ଗବାସୀ ସହଜରେ ଗ୍ରହଣ କରିପାରୁ ନାହାନ୍ତି।

ପ୍ରକାଶ ଯେ, ଜଗନ୍ନାଥ ପୁର ଗ୍ରାମର ୱାର୍ଡସଭ୍ୟ ପିଂଟୁ ରଞ୍ଜନ ନାଥଙ୍କ ଅଭିଯୋଗ ଅନୁଯାୟୀ ଗତକାଲି ଉକ୍ତ ଗ୍ରାମର ଫକୀର ନାଥ(୫୭)ଙ୍କ ହଠାତ ଛାତିରେ ଯନ୍ତ୍ରଣା ଅନୁଭବ କରିଥିଲେ। ଫଳରେ ତାଙ୍କର ସମ୍ପର୍କୀୟ ମାନେ ତୁରନ୍ତ ରାତି ୮.୪୦ ସମୟରେ କୁଜଙ୍ଗ ମେଡିକାଲରେ ଭର୍ତ୍ତି କରାଇଥିଲେ। ତାଙ୍କର ପେଟ ଓ ଛାତିର ଯନ୍ତ୍ରଣା ହେଉଥିବା କଥା ଫକୀର ଡାକ୍ତରଙ୍କୁ କହିଥିଲେ। ମାତ୍ର କାର୍ଯ୍ୟରତ ଡାକ୍ତର କିଛି ନବୁଝି ଏକ ଇଞ୍ଜେକ୍ସନ ଦେଇଥିଲେ। ଫଳରେ ତୁରନ୍ତ ତାଙ୍କ ପାଟି ଓ ନାକରୁ ଫେଣ ବାହାରିବାରୁ ତାଙ୍କର ମଅତ୍ୟୁ ହୋଇଥିଲା। ତୁରନ୍ତ ଡାକ୍ତର ରୋଗୀ ପରାମର୍ଶ ଚିକତ୍ସା ପତ୍ର ଛଡାଇ ନେଇ ଆଉକିଛି ଲେଖିଥିଲେ। ଏବଂ ଧମକ ଦେଇ କହିଥିଲେ ଏହି ମୃତ ଶରୀରକୁ ନେଇ ଗାଁରେ ପୋତି ଦିଅ। ତା ସହିତ ଶବ ବ୍ୟବଛେଦ କରିବାକୁ ଦାବିକଲେ ତୁମ ସମ୍‌ତଙ୍କୁ ଆମେ ତିନିଜଣ ଡାକ୍ତର ମିଛ କେଶରେ ଫସାଇ ଦେଇ ଜେଲ ହାଜାତକୁ ପଠାଇ ଦେବୁ ବୋଲି ପିଂଟୁ ଅଭିଯୋଗରେ ପ୍ରକାଶ କରିଛନ୍ତି।

ଅଭିଯୋଗ ଆଧାରରେ ପୁଲିସ ୫୩୫/୨୩ ସଙ୍ଖ୍ୟାରେ ୩୦୪(ଏ)୩୪ ଆଇପିସି ଧାରାରେ ମାମଲା ରୁଜୁ କରାଯାଇଛି। ଆଜି ମଧ୍ୟାହ୍ନରେ କୁଜଙ୍ଗ ଥାନା ଅଧିକାରୀ ରଶ୍ମୀରଞ୍ଜନ ଦାଶ ମେଡିକାଲ ଯାଇ ଏହି ଘଟଣା ତଦ୍ଦନ୍ତ କରିଛନ୍ତି। ଏବେ ଏଠାରେ ପ୍ରଶ୍ନ ଉଠୁଛି ଯେ, ଗତକାଲି ଏହି ଘଟଣା ଘଟିଥିବାବେଳେ ମେଡିକାଲର ଚିକିତ୍ସାଧିକାରୀ ଡାକ୍ତର ପ୍ରସନ୍ନ କୁମାର ପଣ୍ଡା କାହିଁଙ୍କି ଅନୁପସ୍ଥିତ ଥିଲେ। ସେହିପରିଭାବେ ଜଣେ ଅଭିଜ୍ଞ ଏମବିବିଏସ ଡାକ୍ତର ଥାଉଥାଉ ଜଣେ ଗୁରୁତରରୋଗୀଙ୍କୁ ସେ ଚିକିତ୍ସା ନକରି କଣ ପାଇଁ ଆୟୂଷ ଡାକ୍ତରଙ୍କୁ ଛାଡି ଦେଇଥିଲେ। ଆୟୂଷ ଡାକ୍ତର ମାନେ ମଧ୍ୟ କିପରି ଭାବେ ରୋଗ ନୀରୂପଣ ନକରି ଚିକିତ୍ସା କଲେ ବୋଲି ପ୍ରଶ୍ନ ଉଠୁଛି। ଏହି ଘଟଣାରେ ଅଭିଯୁକ୍ତ ଡାକ୍ତର ମହାକୁଡ ସେ ସଠିକ ସମୟରେ ରୋଗୀକୁ ପରୀକ୍ଷା କରିବା ସହିତ ରୋଗୀକୁ କଟକ ରେଫର କରିଥିଲେ। ମାତ୍ର ରୋଗୀକୁ କଟକ ନେବାକୁ ବିଳମ୍ବ କରିବାରୁ ତାଙ୍କର ମୃତ୍ୟୁ ହୋଇଥିବା କହିଥିଲେ।

ସେହିପରିଭାବେ ଆୟୂଷ ଡାକ୍ତର ମଧ୍ୟ ଏହି ରୋଗୀର ଚିକତ୍ସା କରିବାରେ କୌଣସି ଅସୁବିଧା ନାହିଁ ଓ ଏହି ଘଟଣାର ତଦ୍ଦନ୍ତ କରାଯିବାପରେ ଓ ପୋଷ୍ଟମର୍ଟମ ରିପୋର୍ଟ ଆସିବାପରେ ପ୍ରକୃତ ଘଟଣା ଜଣାପଡ଼ିବ ବୋଲି ଚିକତ୍ସାଧିକାରୀ ଡାକ୍ତର ପ୍ରସନ୍ନ କୁମାର ପଣ୍ଡା ପ୍ରକାଶ କରିଛନ୍ତି।