ରଗ୍‍ବୀ ଇଣ୍ଡିଆର ଦୁଇ ଦିନିଆ କର୍ମଶାଳା

ଭୁବନେଶ୍ୱର: କିଟ୍‍ ପରିସରରେ ରଗ୍‍ବୀ ଇଣ୍ଡିଆର ଦୁଇ ଦିନିଆ କର୍ମଶାଳା (ରଗ୍‍ବୀ ଇଣ୍ଡିଆ ସିମ୍ପୋଜିଅମ୍‍ ଫର ଏକ୍‍ସଲେନସ- ରାଇଜ୍‍) ରବିବାର ଆରମ୍ଭ ହୋଇଛି। ଏଥିରେ ରଗବୀ ଇଣ୍ଡିଆ ଫେଡେରେସନ୍‍ ସଭାପତି ରାହୁଳ ବୋଷ ଯୋଗଦେଇ କହିଲେ, ଓଡ଼ିଶା ଭୁବନେଶ୍ୱର ବିଶେଷ କରି କିଟ୍‍ ଓ କିସ୍‍ ହେଉଛି ଭାରତୀୟ ରଗ୍‍ବୀର ଏନ୍ତୁଡ଼ିଶାଳ। କିଟ୍‍ ଓ କିସ୍‍ ରଗ୍‍ବୀ ପ୍ରଚାର ଓ ପ୍ରସାର ଦିଗରେ ସହଯୋଗ ଓ ପ୍ରୋତ୍ସାହିତ କରିଆସୁଛି। ଏହି କର୍ମଶାଳାରେ ୨୭ଟି ରାଜ୍ୟସ୍ତରୀୟ ଆସୋସିଏନ୍‍ର କର୍ମକର୍ତ୍ତା ଯୋଗଦେଇଥିବା ବେଳେ ୨୦୨୨-୨୩ରେ ଭାରତୀୟ ରଗ୍‍ବୀର ପ୍ରଚାର ଓ ପ୍ରସାର ଲାଗି ଯେଉଁ ଯୋଜନା ପ୍ରସ୍ତୁତ କରାଯାଇଛି ତାହା ଉପରେ ଆଲୋଚନା କରାଯିବ। ଏଥିପାଇଁ ରଗ୍‍ବୀ ଇଣ୍ଡିଆ ପକ୍ଷରୁ ରାଜ୍ୟଗୁଡ଼ିକୁ କି ପ୍ରକାର ଆର୍ଥିକ ଓ ବୈଷୟିକ ସହାୟତା ସମେତ ଅନ୍ୟାନ୍ୟ ସହାୟତା ଯୋଗାଇ ଦିଆଯାଇ ପାରିବେ ସେ ନେଇ ଆଲୋଚନା କରାଯିବ। ଏହା ବ୍ୟତୀତ ଉତ୍କୃଷ୍ଟ କ୍ରୀଡ଼ା ପ୍ରଦର୍ଶନ ଦିଗରେ ରାଜ୍ୟଗୁଡ଼ିକରୁ ରଗ୍‍ବୀ ଇଣ୍ଡିଆ କଣ ସବୁ ଆଶା କରୁଛି ତାହା ମଧ୍ୟ ଆଲୋଚନା ହେବ।
ଏଥିଲାଗି ସାମୂହିକ ଆଲୋଚନା ହେବା ସହ ପ୍ରତ୍ୟେକ ରାଜ୍ୟ ସହ ପୃଥକ ଆଲୋଚନା କାର୍ଯ୍ୟକ୍ରମ ରହିଛି ବୋଲି ସେ କହିଥିଲେ। ଏହି ଅବସରରେ ସେ ରଗ୍‍ବୀକୁ ଆନ୍ତର୍ଜାତୀୟସ୍ତରରେ ପହଞ୍ଚାଇବା ପାଇଁ କିଟ୍‍ ଓ ଏହାର ପ୍ରତିଷ୍ଠାତା ଅଚ୍ୟୁତ ସାମନ୍ତଙ୍କ ଉଦ୍ୟମକୁ ରାହୁଳ ଉଚ୍ଚ ପ୍ରଶଂସା କରିଥିଲେ। ଅପରପକ୍ଷରେ ଶ୍ରୀ ସାମନ୍ତ କହିଲେ, ୨୦୦୫ ମସିହାରୁ ରଗ୍‌ବୀକୁ କିଟ୍‍ ଓ କିସ୍‍ ବ୍ୟାପକ ଭାବେ ପ୍ରଚାର ଓ ପ୍ରସାର କରିଆସିବା ସହ ପ୍ରୋତ୍ସାହନ ଦେଇଆସୁଛି। ସେହିଦିନଠାରୁ ରଗବୀ ଇଣ୍ଡିଆ ସହ କିଟ୍‍ ଓ କିସ୍‍ ଜଡ଼ିତ ରହିଆସିଛି। କେବଳ ରଗବୀ ନୁହେଁ ଅନ୍ୟାନ୍ୟ କ୍ରୀଡ଼ା ଓ କ୍ରୀଡ଼ାବିତଙ୍କୁ ମଧ୍ୟ କିଟ୍‍ ଓ କିସ୍‍ ପ୍ରୋତ୍ସାହନ ଦେଇ ଆସୁଛି। କେବଳ ଭାରତ ନୁହେଁ ସମଗ୍ର ବିଶ୍ୱରେ କିଟ୍‍ ଓ କିସ୍‍ କ୍ରୀଡ଼ାର ହବ୍‍ ପାଲଟିଛି ବୋଲି ଶ୍ରୀ ସାମନ୍ତ କହିଥିଲେ। ଏହି କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ଇଣ୍ଡିଆନ୍‍ ରଗବୀ ଫୁଟବଲ ଯୁନିଅନର ସମ୍ପାଦକ ଗେରାଲଡ ଆଣ୍ଟୋନି ପ୍ରଭୁ, ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ନାସିର୍‍ ହୁସେନ୍‍, ଓଡ଼ିଶା ରଗବି ଆସୋସିଏସନର ସଭାପତି ପ୍ରିୟଦର୍ଶୀ ମିଶ୍ର, ସମ୍ପାଦକ ଉପେନ୍ଦ୍ର ମହାନ୍ତି, କିଟ୍‍ କ୍ରୀଡ଼ା ନିର୍ଦ୍ଦେଶକ ଡ. ଗଗନେନ୍ଦୁ ଦାଶଙ୍କ ସମେତ ବିଭିନ୍ନ ରାଜ୍ୟ ରଗବୀ ଆସୋସିଏସନର କର୍ମକର୍ତ୍ତା ଉପସ୍ଥିତ ଥିଲେ ।