ବବି ଦାସଙ୍କ ସରକାରୀ ବାସଭବନର ଭଙ୍ଗାରୁଜାକୁ ନେଇ ଉଠିଲା ପ୍ରଶ୍ନ: ପ୍ରତିକ୍ରିୟା ରଖିଲେ ବିଜେଡ଼ି ନେତା

ଭୁବନେଶ୍ଵର: ବିଜେଡି ନେତା ପ୍ରଣବ ପ୍ରକାଶ ଦାସଙ୍କ ସରକାରୀ ବାସଭବନରେ ଭଙ୍ଗାରୁଜା ଚାଲିଥିବା ଖବର ମିଳିଛି। ବବିଙ୍କ ସରକାରୀ ବାସଭବନରେ ୧୦ ରୁ ଉର୍ଦ୍ଧ୍ୱ ଶ୍ରମିକ ନିୟୋଜିତ ଥିବା ଜଣାପଡ଼ୁଛି। ଯେହେତୁ ବବି ଦାସ ବର୍ତ୍ତମାନ କୌଣସି ସରକାରୀ ପଦପଦବୀରେ ନାହାଁନ୍ତି, ତାଙ୍କୁ ସେ ଘର ମଧ୍ୟ ଛାଡ଼ିବାକୁ ପଡ଼ିପାରେ। ଏଣୁ ସେ କ୍ୱାର୍ଟରର ପୂର୍ବ ଅବସ୍ଥା ଫେରାଇ ଆଣିବା ପାଇଁ କ୍ୱାର୍ଟର ଭଙ୍ଗାଯାଉଛି ବୋଲି ସୂଚନା ମିଳୁଛି।

ସୂଚନା ଅନୁଯାୟୀ, ସେଠାରେ ତିନି ମହଲା ବିଶିଷ୍ଟ ଘର ତିଆରି ହେବା ସହ ସୁଇମିଂ ପୁଲ, ରୁଫ ଟପ କଟେଜ ଏବଂ ବିଳାସପୂର୍ଣ୍ଣ ଭୂତଳ ଗୃହ ନିର୍ମାଣ ହୋଇଥିବା ଜଣାପଡିଛି। ତେବେ କେଉଁ ଉଦ୍ଦେଶ୍ୟରେ ସରକାରୀ ଘରେ ଏତେ ବଡ଼ ନିର୍ମାଣ ହୋଇଥିଲା? ଏହି ନିର୍ମାଣ ପାଇଁ କିଏ ଦେଇଥିଲା ଅନୁମତି? ଏହାକୁ ନେଇ ଅନେକ ପ୍ରଶ୍ନ ଉଠିଛି। ସରକାରୀ ବାସଭବନ ଭାଙ୍ଗିବା ଆଇନ ବିରୋଧୀ ବୋଲି କୁହାଯାଉଥିବା ବେଳେ ବବି ଦାସ ଏହା ଉପରେ ପ୍ରତିକ୍ରିୟା ରଖିଛନ୍ତି।

ବବି ଦାସ କହିଛନ୍ତି ଯେ, ”ନିୟମ ଅନୁସାରେ ଘର ଯେମିତି ନେଇଥିଲି ଫେରାଇବି। ଯେହେତୁ ମୁଁ ବିଜେଡ଼ି ଦଳର ସଂଗଠନ ସମ୍ପାଦକ ଥିଲି, ତେଣୁ ଦେଖାକରିବା ପାଇଁ ଅନେକ ନେତା ଓ ଲୋକ ଆସୁଥିଲେ। ଲୋକଙ୍କ ଅଭିଯୋଗ ଶୁଣିବା ପାଇଁ ଏସବୁ ବ୍ୟବସ୍ଥା ହୋଇଥିଲା।”