ଆଠଗଡ ନିର୍ବାଚନ ମଣ୍ଡଳିର ଗଳିକନ୍ଦି କାହିଁକି ବୁଲୁଛନ୍ତି ମନ୍ତ୍ରୀ ରାଜା ସ୍ବାଇଁଙ୍କ ପୁଅ ଆଦିତ୍ୟ ?

ଭୁବନେଶ୍ବର: ବର୍ତ୍ତମାନ ଆଠଗଡ ନିର୍ବାଚନ ମଣ୍ଡଳିରେ ଏକ ବଡ ଚର୍ଚ୍ଚା ଚାଲିଛି। ତାହା ହେଲା ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ବାଇଁଙ୍କ ପୁଅ ଆଦିତ୍ୟ ପ୍ରତାପ ସ୍ବାଇଁଙ୍କ ନିର୍ବାଚନ ମଣ୍ଡଳି ବୁଲିବା। ଆଦିତ୍ୟ ବେଶ କିଛି ଦିନ ଧରି ସକାଳୁ ଘରୁ ବାହାରି ଆଠଗଡର ଗଳକନ୍ଦି କୁଲିବାରେ ଲାଗିଛନ୍ତି। କେଉଁଠି ଅଷ୍ଟପ୍ରହରୀ ନାମ ସଂକୀର୍ତ୍ତନ, କେଉଁଠି କ୍ରିକେଟ ମ୍ୟାଚ, କେଉଁଠି ଫୁଟବଲ ମ୍ୟାଚ, କାହାର ଶ୍ରାଦ୍ଧ କାର୍ଯ୍ୟ ସବୁଠି ସେ ହାଜର।

ତେବେ ଏହାର କାରଣ ହେଲା ଯେ, ଆଦିତ୍ୟ ପ୍ରତାପ ଏଥର ନିର୍ବାଚନ ଲଢେଇ କରିବେ। ତାଙ୍କ ବାପା ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ବାଇଁ କୁଆଡେ ଆଉ ନିର୍ବାଚନ ଲଢେଇରେ ସାମିଲ ହେବେ ନାହିଁ। ସେ ନେଇ ରଣେନ୍ଦ୍ର ଦଳକୁ ଜଣାଇ ଦେଇଛନ୍ତି। ଏଥିସହିତ ତାଙ୍କ ପୁଅ ଏଥର ନିର୍ବାଚନ ଲଢିବ ବୋଲି ମଧ୍ୟ ଦଳକୁ ଅନୁରୋଧ କରିଛନ୍ତି।

ରାଜ୍ୟର ଜଣେ ବରିଷ୍ଠ ମନ୍ତ୍ରୀ ତଥା ଦଳର ଜଣେ ବରିଷ୍ଠ ନେତାଙ୍କ ଅନୁରୋଧକୁ କୁଆଡେ ବିଜେଡି ଗ୍ରହଣ କରିଛି। ତାଙ୍କ ପୁଅଙ୍କୁ ଟିକେଟ ଦିଆଯିବ ବୋଲି ନିର୍ଭର ପ୍ରତିଶ୍ରୁତି ମଧ୍ୟ ମିଳିଛି। ଫଳରେ ରଣେନ୍ଦ୍ର ପ୍ରତାପ ବା ରାଜା ସ୍ବାଇଁ ତାଙ୍କ ପୁଅକୁ ବର୍ତ୍ତମାନ ରାଜନୈତିକ ମଇଦାନକୁ ଛାଡି ଦେଇଛନ୍ତି। ଫଳରେ ଆଦିତ୍ୟ ବର୍ତ୍ତମାନ ସକାଳୁ ଉଠି ସାରା ନିର୍ବାଚନ ମଣ୍ଡଳି ବୁଲିବୁଲି ରାତିରେ ଘରକୁ ଫେରୁଛନ୍ତି।