ଆସନ୍ତା ୪ ରେ ଘୋଷଣା ହେବ ନିର୍ବାଚନ ତାରିଖ !! ନେତାଙ୍କ ଛାତି ଧଡଧଡ

ନୂଆଦିଲ୍ଲୀ: ବର୍ତ୍ତମାନ ସାରା ଦେଶରେ ଯାହା ସବୁଠୁ ଅଧିକ ଚର୍ଚ୍ଚା ତାହା ହେଉଛି ନିର୍ବାଚନ କେବେ ହେବ। ଏହାପରେ କିଏ ଟିକେଟ ପାଇବ ପ୍ରଭୃତି ଆସିବ। ତେବେ ଏକ ବିଶେଷ ସୁତ୍ରରୁ ମିଳିଥିବା ସୂଚନା ଅନୁସାରେ ମାର୍ଚ୍ଚ ୪ ରେ ନିର୍ବାଚନ ତାରିଖ ଘୋଷଣା ହେବ। ଏ ନେଇ ଭାରତୀୟ ନିର୍ବାଚନ କମିସନର ପ୍ରସ୍ତୁତି ଆରମ୍ଭ କରିଛନ୍ତି ବୋଲି କୁହାଯାଉଛି।

ବର୍ତ୍ତମାନ ନିର୍ବାଚନ କମିସନର ବିଭିନ୍ନ ରାଜ୍ୟ ଭ୍ରମଣ କରି ନିର୍ବାଚନ ପ୍ରସ୍ତୁତି ଉପରେ ସମୀକ୍ଷା କରିବାରେ ଲାଗିଛନ୍ତି। ଯେହେତୁ ଜୁନ ମାସରେ ସରକାରଙ୍କ କାର୍ଯ୍ୟକାଳ ଶେଷ ହେଉଛି ତା ପୂର୍ବରୁ ନିର୍ବାଚନ କାର୍ଯ୍ୟ ଶେଷ କରିବାକୁ ହେବ। ସେଥିପାଇଁ ମାର୍ଚ୍ଚରେ ନିର୍ବାଚନ ତାରିଖ ଘୋଷଣା ହେଲେ ଏପ୍ରିଲ ମେ ରେ ନିର୍ବାଚନ ଶେଷ ହେବ।

ଆଗରୁ ଚର୍ଚ୍ଚା ହେଉଥିଲା ଯେ ନିର୍ବାଚନ କମିସନର ମାର୍ଚ୍ଚ ୯ ତାରିଖ ପରେ ଯେ କୌଣସି ସମୟରେ ଘୋଷଣା କରିପାରନ୍ତି। ହେଲେ ବର୍ତ୍ତମାନ ଏହା ମାର୍ଚ୍ଚ ୪ ବୋଲି ନୂଆଦିଲ୍ଲୀରେ ଚର୍ଚ୍ଚା ଆରମ୍ଭ ହୋଇଯାଇଛି। ଗତଥର ନିର୍ବାଚନ ତାରିଖ ଘୋଷଣା ମାର୍ଚ୍ଚ ୧୦ ତାରିଖରେ ହୋଇଥିଲା। ତେବେ ଏଥର ଆଗୁଆ ଘୋଷଣା ହେବ ବୋଲି ସ୍ପଷ୍ଟ ସୂଚନା ମିଳିଛି।

ଗତଥର ସାତୋଟି ପର୍ଯ୍ୟାୟରେ ନିର୍ବାଚନ ହୋଇଥିଲା। ତାହା ଏପ୍ରିଲ ୧୧ ତାରିଖରୁ ମେ ୧୯ ତାରିଖ ମଧ୍ୟରେ ନିର୍ବାଚନ ଅନୁଷ୍ଠିତ ହୋଇଥିଲା। ଏହାପରେ ମେ ୨୩ ତାରିଖରେ ଭୋଟ ଗଣତି କରାଯାଇଥିଲା। ଏଥର ମଧ୍ୟ ସେହିପରି କରାଯିବ ବୋଲି ଅନୁମାନ କରାଯାଉଛି।