ଶିଶୁ ଦିବସରେ ଚାଲିଗଲେ କେନ୍ଦ୍ର ସାହିତ୍ୟ ଏକାଡେମୀ ର ବାଲ୍ ସାହିତ୍ୟ ପୁରସ୍କାର ପ୍ରାପ୍ତ ଶିଶୁ ସାହିତ୍ୟିକ

ରେଢାଖୋଲ (କନ୍ଦର୍ପ ବେହେରା): ଓଡିଆ ଶିଶୁ ସାହିତ୍ୟ ଜଗତରେ ଚହଳ ପକାଇଥିବା ବିଶିଷ୍ଟ ଶିଶୁ ସାହିତ୍ୟିକ ଡଃ ଶୁଭେନ୍ଦ୍ର ମୋହନ ଶ୍ରୀ ଚନ୍ଦନ ସିଂହ ରାତି ୧ଟା ୨୩ ମିନିଟରେ ନାଗପୁରରେ ମୃତ୍ୟୁବରଣ କରିଥିବା ଜଣା ପଡିଛି। ମୃତ୍ୟୁବେଳକୁ ତାଙ୍କୁ ୯୦ ବର୍ଷ ହୋଇଥିଲା।

ଶିଶୁ ସାହିତ୍ୟିକ ଡଃ ଚନ୍ଦନ ଓଡିଆ ଶିଶୁ ସାହିତ୍ୟର ଜଣେ ସଫଳ ସାରସ୍ବତ ସାଧକ। ସେ ୧୯୩୩ ମସିହା ଅଗଷ୍ଟ ୬ ରେ ଅନୁଗୋଳ ଜିଲ୍ଲାର ଆଠମଲ୍ଲୀକ ର ପାପସରା ଗ୍ରାମରେ ଜନ୍ମଗ୍ରହଣ କରିଥିଲେ। ସେ ୧୦୦ ରୁ ଉଦ୍ଧ୍ବ ପୁସ୍ତକ ରଚନା କରିଛନ୍ତି। ପୁସ୍ତକ ଗୁଡିକ ମଧ୍ୟରେ ଟିକିପରୀ, ଗବେଷଣା ପ୍ରସଙ୍ଗ ,ହୋ ହୋ ରାଣୀ,ଲାଲ୍ ଟୁକୁନିର କଥା,କଥା ଶତକ, ମୁଁ ମୋ ମାତ୍ରୁଭାଷା ମୋ ଜୀବନ (ଆତ୍ମଜୀବନୀ), ଅନଳ (ଗଳ୍ପ), ନାରୀ ବନାମ ସୁନନ୍ଦା (ଗପ), ଗାୟତ୍ରୀ ନିଳୟେ ଅଶୁଭ ରାତ୍ରୀ (ଉପନ୍ୟାସ), ନରଖାଦକର ଆହ୍ବାନ (ଅନୁବାଦ), ଆଦି ଅନ୍ୟତମ। ସେ ୨୦୧୭ ମସିହାରେ କେନ୍ଦ୍ର ସାହିତ୍ୟ ଏକାଡେମୀ ତରଫରୁ ବାଲ୍ ସାହିତ୍ୟ ପୁରସ୍କାର ପାଇଥିଲେ। ୨୦୧୦ ମସିହାରେ “ଟିକିପରି” ପୁସ୍ତକ ପାଇଁ ଓଡିଶା ସାହିତ୍ୟ ଏକାଡେମୀ ତରଫରୁ ମଧ୍ୟ ପୁରସ୍କାର ପାଇବା ସହ ଓଡିଶାର ବହୁ ଅନୁଷ୍ଠାନରୁ ପୁରସ୍କାର ପାଇଥିଲେ। ସେ ମାଧ୍ୟମିକ ଶିକ୍ଷା ପରିଷଦର ଓଡିଆ ଭାଷା ବିଶେଷଜ୍ଞ ଭାବରେ ମଧ୍ୟ କାର୍ଯ୍ୟ କରି ଅବସର ନେଇଥିଲେ।

ଡଃ ଚନ୍ଦନ ନାଗପୁରରେ ପୁଅ ପ୍ରଫେସର ଡଃ ଶିଳାଦିତ୍ୟ ବିକାଶ ଶ୍ରୀଚନ୍ଦନ ସିଂହ ପାଖରେ ଦୀର୍ଘ ଦିନ ହେଲା ରହି ଆସୁଥିଲେ। ରେଢାଖୋଲରେ ମଧ୍ୟ ନିଜ ପୁତ୍ର ଅଧ୍ୟାପକ ଡଃ ବାଳାଦିତ୍ୟ ବିକାଶ ଶ୍ରୀ ଚନ୍ଦନଙ୍କ ପାଖରେ କିଛି ବର୍ଷ ଅବସ୍ଥାନ କରିଥିଲେ। ଜୀବନର ଶେଷ ପର୍ଯ୍ୟନ୍ତ ସେ ଲେଖନୀ ଚାଳନା କରିଥିଲେ। ତାଙ୍କ ମୃତ୍ୟୁରେ ଓଡିଆ ସାହିତ୍ୟର ଅପୂରଣୀୟ କ୍ଷତି ହୋଇଛି। ମୃତ୍ୟୁ ଶଯ୍ୟା ନିକଟରେ ପତ୍ନୀ, ପୁଅ, ପୁତ୍ର ବଧୂ ଆଦି ଉପସ୍ଥିତ ଥିଲେ।