ଭାରସାମ୍ୟ ହରାଇ ତାମ୍ପରା ହ୍ରଦରେ ବୁଡ଼ିଗଲା ଡଙ୍ଗା: ଭାଉଜ ମୃତ, ନଣନ୍ଦ ଉଦ୍ଧାର

ବ୍ରହ୍ମପୁର (କୈଳାଶ ଚନ୍ଦ୍ର ଚୌଧୁରୀ): ଛତ୍ରପୁର ହୁମର ଗ୍ରାମରେ ଏକ ଅଭାବନୀୟ ଘଟଣା ଘଟିଯାଇଛି। ଟାମ୍ପରା ହ୍ରଦରେ ଡଙ୍ଗା ବୁଡି ଭାଉଜର ମୃତ ହୋଇଥିବା ବେଳେ ନଣନ୍ଦକୁ ଉଦ୍ଧାର କରାଯାଇଛି।

ସୂଚନା ଅନୁଯାୟୀ, ତାମ୍ପରା ହ୍ରଦ ପାର ହୋଇ ଜଙ୍ଗଲରୁ କାଠ ଆଣିବା ପାଇଁ ଭାଉଜ ପୁଷ୍ପା ବେହେରା ଓ ନଣନ୍ଦ ବନିତା ବେହେରା ଯାଇଥିଲେ। ଉଭୟ କାଠ ଆଣି ଡଙ୍ଗା ସାହାଯ୍ୟରେ ଫେରୁଥିବା ବେଳେ ଅଘଟଣ ଘଟିଥିଲା। ଡଙ୍ଗାଟି ଭାରସାମ୍ୟ ହରାଇ ହ୍ରଦରେ ଓଲଟି ପଡ଼ିଥିଲା। ଯାହା ଫଳରେ ଉଭୟେ ଡଙ୍ଗାରୁ ଖସି ଯାଇ ଚିତ୍କାର କରିଥିଲେ।

ନିକଟରେ ଥିବା ଲୋକମାନେ ସଙ୍ଗେ ସଙ୍ଗେ ଅଗ୍ନିଶମ ବିଭାଗକୁ ଖବର ଦେଇଥିଲେ। ଓଡ୍ରାଫ୍ ଟିମ୍ ଘଟଣାସ୍ଥଳରେ ପହଞ୍ଚି ଖୋଜାଖୋଜି କରି ଭାଉଜ ପୁଷ୍ପାକୁ ମୃତ ଅବସ୍ଥାରେ ଉଦ୍ଧାର କରିଥିଲା ବେଳେ ନଣନ୍ଦକୁ ଅଚେତ ଅବସ୍ଥାରେ ଉଦ୍ଧାର କରି ଚିକିତ୍ସା ପାଇଁ ଡାକ୍ତରଖାନାକୁ ପଠାଇଥିଲେ। ଏହି ଖବର କୁ ନେଇ ଗାଁ ରେ ଶୋକାକୁଳ ପରିବେଶ ସୃଷ୍ଟି ହୋଇଛି।