ବର୍ଷିୟାନ ସାମ୍ବାଦିକ ଶରତ ମିଶ୍ରଙ୍କ ପରଲୋକ, ଓଡିଆ ଗଣମାଧ୍ୟମରେ ଶୋକର ଛାୟା

ଭୁବନେଶ୍ବର: ଓଡିଶାର ବର୍ଷିୟାନ ସାମ୍ବାଦିକ ତଥା ସମାଜ ର ପୂର୍ବତନ ସମ୍ପାଦକ ଶରତ ମିଶ୍ରଙ୍କର ପରଲୋକ ଘଟିଛି। ମୃତ୍ୟୁ ବେଳକୁ ତାଙ୍କୁ ୮୭ ବର୍ଷ ବୟସ ହୋଇଥିଲା। ସେ ଓଡିଶା ଗଣ ମାଧ୍ୟମର ଜଣେ ପରିଚିତ ବ୍ୟକ୍ତିତ୍ବ। ସେ ବ୍ରହ୍ମପୁରରୁ ପ୍ରକାଶିତ ଅନୁପମ ଭାରତର ପ୍ରତିଷ୍ଠାତା ସମ୍ପାଦକ ଭାବେ ମଧ୍ୟ କାର୍ଯ୍ୟ କରିଥିଲେ।

ସେ ପ୍ରଥମେ ଇଷ୍ଟର୍ଣ୍ଣ ଟାଇମସ ଗ୍ରୁପରୁ ନିଜର ସାମ୍ବାଦିକତା ଆରମ୍ଭ କରିଥିଲେ। ସମ୍ବାଦ ଖବର କାଗଜ ଆରମ୍ଭ ବେଳେ ସେ ଥିଲେ ବାର୍ତ୍ତା ସଂପାଦକ। ଏହାପରେ ସେ ବିଭିନ୍ନ ସମୟରେ କୋଲକାତାରୁ ପ୍ରକାଶିତ ଅମୃତ ବଜାର ପତ୍ରିକାରେ ଓଡିଶା ପ୍ରତିନିଧି ଭାବେ ଦୀର୍ଘ ବର୍ଷ ଧରି କାର୍ଯ୍ୟ କରିଥିଲେ। ସେ ସମାଜର ସଂପାଦକରୁ ଅବସର ନେବା ପରେ ପ୍ରତିନିଧି ନାମିତ ଏକ ଫିଚର ପତ୍ରିକାର ସଂପାଦକ ଥିଲେ।

ତାଙ୍କ ବିୟୋଗରେ ଓଡିଆ ସାମ୍ବାଦିକ ଜଗତରେ ଶୋକର ଛାୟା ଖେଳିଯାଇଛି।