କଂଗ୍ରେସର ଲୋକସଭା ଓ ବିଧାନସଭା ପ୍ରାର୍ଥୀ ତାଲିକା ଚୁଡାନ୍ତ, ହୋଲି ପରେ ଘୋଷଣା

ଭୁବନେଶ୍ବର: ଓଡିଶାରେ ବିଜେଡି ବିଜେପି ମେଣ୍ଟ ଭିତରେ କଂଗ୍ରେସ ତାହାର ରଣନୀତି ପ୍ରସ୍ତୁତ କରିବାରେ ଲାଗିଛି। ଭୁବନେଶ୍ବର ଓ ଦିଲ୍ଲୀରେ ଘନଘନ ବୈଠକ କରି ଦଳ ମୁକିବିଲା ସ୍ଥିତିରେ ରହିଛି। ବିଭିନ୍ନ ବୈଠକରେ ଦଳର ଶୀର୍ଷ ନେତୃବୃନ୍ଦ ଓଡିଶାର ମେଣ୍ଟ ରାଜନୀତିକୁ ତୀକ୍ଷ୍ମ ନଜରରେ ରଖିଛନ୍ତି। ସେହି ଅନୁସାରେ କଂଗ୍ରେସ ଓଡିଶାର ପ୍ରାର୍ଥୀ ଘୋଷଣା କରିବ ବୋଲି ଜଣାପଡିଛି।

ତେବେ ନୂଆଦିଲ୍ଲୀରେ ଏଆଇସିସି ସାଧାରଣ ସଂପାଦକ କେ ବେଣୁଗୋପାଳଙ୍କ ଅଧ୍ୟକ୍ଷତାରେ ଏକ ବୈଠକ ନୂଆଦିଲ୍ଲୀରେ ଅନୁଷ୍ଠିତ ହୋଇଥିଲା। ଏଥିରେ ଓଡିଶାର ପ୍ରଭାରୀ, ନିର୍ବାଚନ ପ୍ରଭାରୀ ଏବଂ ସଭାପତି ଶରତ ପଟ୍ଟନାୟକ ଯୋଗଦେଇଥିଲେ। ସେଥିରେ ଓଡିଶାରେ କିପରି ରଣନୀତି ହେବ ସେ ସଂପର୍କରେ ଆଲୋଚନା କରାଯାଇଥିଲା। ଏଥିସହିତ ଓଡିଶାର ସମସ୍ତ ବିଧାନସଭା ଓ ଲୋକସଭା ଆସନ ଉପରେ ଆଲୋଚନା କରାଯାଇଥିଲା।

ଓଡିଶା ପ୍ରଦେଶ କଂଗ୍ରେସ ତରଫରୁ ସବୁ ଆସନର ଏକ ପ୍ରାର୍ଥୀ ତାଲିକା ପ୍ରସ୍ତୁତ କରାଯାଇଥିଲା। ସେହି ତାଲିକା ଉପରେ ବେଣୁଗୋପାଳ ଆଲୋଚନା କରିଥିଲେ। ସେଥିରେ ଗୋଟିଏ ଗୋଟିଏ ଆସନରେ ତିନି ଜଣ ପ୍ରାର୍ଥୀଙ୍କ ନାମ ରହିଛି। ହେଲେ କେତେକ ନିର୍ବାଚନ ମଣ୍ଡଳୀରେ ଜଣଙ୍କ ନାମ ଦିଆଯାଇଛି। ଯେଉଁ ସ୍ଥାନରେ କଂଗ୍ରେସ ବିଧାୟକ ଅଛନ୍ତି ସେମାନଙ୍କୁ ପୁଣି ଥରେ ପ୍ରାର୍ଥୀ କରାଯିବ ବୋଲି ବେଣୁଗୋପାଳଙ୍କୁ ଅବଗତ କରାଯାଇଛି।

ଏଥିସହିତ ଓଡିଶା ପ୍ରଭାରୀ ଅଜୟ କୁମାର ପ୍ରାର୍ଥୀ ଚୟନ ପାଇଁ କିପରି ଅନଲାଇନ ମାଧ୍ୟମରେ ପ୍ରଗମନ ବ୍ୟବସ୍ଥା କରାଯାଇଥିଲା ତାହା ଉପରେ ଆଲୋକପାତ କରାଇଥିଲେ। ତାହାରି ଆଧାରରେ ଏହି ତାଲିକା କରାଯାଇଛି ବୋଲି ଅଜୟ କୁମାର ବେଣୁଗୋପାଳଙ୍କୁ ଅବଗତ କରାଇଥିଲେ।

ଏଥର ଓଡିଶାର ଯୁବ ପ୍ରାର୍ଥୀଙ୍କୁ କିପରି ଅଧିକ ସଂଖ୍ୟାରେ ସୁଯୋଗ ପ୍ରଦାନ କରାଯିବ ସେ ନେଇ ଆଲୋଚନା କରାଯାଇଥିଲା। ତେବେ ଚୁଡାନ୍ତ ତାଲିକା ସଭାପତି ମଲ୍ଲିକାର୍ଜ୍ଜୁନ ଖଡଗେ, ରାହୁଳ ଗାନ୍ଧି ଓ ସୋନିଆ ଗାନ୍ଧିଙ୍କ ସହିତ ଆଲୋଚନା ପରେ ହୋଲି ପରେ ଘୋଷଣା କରାଯିବ ବୋଲି କୁହାଯାଇଥିଲା।

ତେବେ ଏହି ବୈଠକରେ ଓଡିଶାରେ କିପରି ପ୍ରଚାର କରାଯିବ ସେ ନେଇ ମଧ୍ୟ ଆଲୋଚନା କରାଯାଇଥିଲା। ସେଥିରେ ଓଡିଶାରେ ନିର୍ବାଚନ ଇସ୍ତାହାର ପ୍ରକାଶ କରାଯାଇଛି ବୋଲି ଦିଲ୍ଲୀ ନେତାଙ୍କୁ ଅବଗତ କରାଯାଇଥିଲା। ସେହିପରି ଓଡିଶା ନିର୍ବାଚନ ପ୍ରଚାରରେ ଦଳର ସଭାପତି ମଲ୍ଲିକାର୍ଜ୍ଜୁନ ଖଡଗେ, ସୋନିଆ ଗାନ୍ଧୀ, ରାହୁଳ ଗାନ୍ଧୀ, ପ୍ରିୟଙ୍କା ଗାନ୍ଧୀ ପ୍ରମୁଖଙ୍କୁ ଷ୍ଟାର ପ୍ରତାର ତାଲିକାରେ ରଖିବା ପାଇଁ ଅନୁରୋଧ କରାଯାଇଛି।