ଭୁବନେଶ୍ବରରେ ସଂଗୀତ ନାଟକ ଏକାଡେମୀ ପକ୍ଷରୁ ନାଟକ ଉତ୍ସବ ଉଦଘାଟିତ

ଭୁବନେଶ୍ବର: ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ଆନୁକୂଲ୍ୟରେ ଓଡ଼ିଶା ସଂଗୀତ ନାଟକ ଏକାଡେମୀ ପକ୍ଷରୁ ପାଞ୍ଚଦିନିଆ ନାଟକ ଉତ୍ସବ ସ୍ଥାନୀୟ ରବୀନ୍ଦ୍ରମଣ୍ଡପଠାରେ ଆଜିଠାରୁ ଶୁଭାରମ୍ଭ ହୋଇଛି। ଓଡ଼ିଶାର ପ୍ରବାଦପୁରୁଷ ଓ ସମାଜ ସଂସ୍କାରକଙ୍କ ଜୀବନୀ ଉପରେ ଆଧାରିତ ବିଭିନ୍ନ ନାଟକ ପ୍ରଦର୍ଶିତ କରାଯିବ।

ଏହି ନାଟକ ଉତ୍ସବକୁ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ କମିଶନର ତଥା ଶାସନ ସଚିବ ଶ୍ରୀମତୀ ସୁଜାତା ରାଉତ କାର୍ତ୍ତିକେୟନ୍‌ ଉଦ୍‌ଘାଟନ କରି କହିଲେ ଯେ ଏହି କାର୍ଯ୍ୟକ୍ରମ ଦ୍ୱାରା ପ୍ରବାଦପୁରୁଷଙ୍କ କୃତି ଓ କୃତିତ୍ୱ ସଂପର୍କରେ ଯୁବପିଢ଼ି ଜାଣିବାର ସୁଯୋଗ ପାଇପାରିବା ସହ ଓଡ଼ିଶାର ସାହିତ୍ୟ, ସଂସ୍କୃତି ଓ ଐତିହ୍ୟକୁ ପ୍ରୋତ୍ସାହିତ କରାଯାଇପାରିବ। ଜିଲ୍ଲାସ୍ତରରେ ଏଭଳି କାର୍ଯ୍ୟକ୍ରମ ଆୟୋଜନ କରାଯାଇ ନାଟକପ୍ରେମୀ ଓ କଳାକାରମାନଙ୍କୁ ପ୍ରୋତ୍ସାହିତ କରାଯିବ ବୋଲି ସେ ମତବ୍ୟକ୍ତ କରିଥିଲେ।

ଏହି ଅବସରରେ ବିଭାଗୀୟ ନିର୍ଦ୍ଦେଶକ ଶ୍ରୀ ଦିଲୀପ ରାଉତରାଏ, ଓଡ଼ିଶା ସଂଗୀତ ନାଟକ ଏକାଡେମୀର ଉପସଭାପତି ଶ୍ରୀ ମନ୍ମଥ ଶତପଥୀ, ସଚିବ ଶ୍ରୀ ପ୍ରବୋଧ ରଥ, ଛାତ୍ରଛାତ୍ରୀ, ବୁଦ୍ଧିଜୀବୀ, ନାଟ୍ୟପ୍ରେମୀ, କଳାକାର ପ୍ରମୁଖ ଉପସ୍ଥିତ ଥିଲେ।

ଆଜିର ପ୍ରଥମ ଦିନରେ ନାଟକ ‘ଉତ୍କଳମଣି’ ପ୍ରଦର୍ଶିତ ହୋଇଛି। ଏହାକୁ ନାଟ୍ୟକାର ଶ୍ରୀ ପଞ୍ଚାନନ ଦାଶ ରଚନା କରିଥିବାବେଳେ ଶ୍ରୀ ଅତିଶ କୁମାର ଶତପଥୀ ନିର୍ଦ୍ଦେଶନା ଦେଇଛନ୍ତି । ସମ୍ବଲପୁରର ଅଦୃଶ୍ୟ ନାଟ୍ୟ ଆଶ୍ରମ ଦ୍ୱାରା ଏହାକୁ ଉପସ୍ଥାପନ କରାଯାଇଥିଲା।

ମାଟି ଓ ମାତୃଭାଷା ପ୍ରୀତି ଜାଗରଣ କରି ଉତ୍କଳମାତାର ସନ୍ତାନ ଭାବେ ଗୋପବନ୍ଧୁଙ୍କ ପରି ପ୍ରତ୍ୟେକ ଓଡ଼ିଆଙ୍କ ମନରେ ଉତ୍କଳୀୟ ଭାବନାକୁ ପୁନରୁଥନ କରିବା ଥିଲା ଏହି ନାଟକର ଆଭିମୁଖ୍ୟ। ବିଭିନ୍ନ ଚରିତ୍ରରେ ନରେନ୍ଦ୍ର ବେହେରା, ଦଧିବାମନ ପଣ୍ଡା, ସୁବଳ ଚନ୍ଦ୍ର ବାଗ୍‌, ପ୍ଳାବନ ମିଶ୍ର, ଶୁଭମ୍‌ ମେହେର, ସଙ୍କେତ ପୁରୋହିତ, ଆଦିତ୍ୟ ସାହା, ସୁବ୍ରତ ଅମାତ, ଉମାଶିଷ ବାଗ୍‌, ରାହୁଲ ଗୁପ୍ତା, ରାହୁଲ ମହାନନ୍ଦ, ପଙ୍କଜିନୀ ମେହେର, ସୁମିତ୍ରା ମହାକୁଡ଼, ଆକାଂକ୍ଷା ଦଣ୍ଡସେନା, ଆରାଧ୍ୟା ଶତପଥୀ, ସ୍ୱସ୍ତିକ ପଣ୍ଡା, ସାଶ୍ୱତ ପଣ୍ଡା ପ୍ରମୁଖ ଅଭିନୟ କରିଥିବାବେଳେ ସଂଗୀତରେ ଗିରିଜା ଶଙ୍କର ମିଶ୍ର, ଘନଶ୍ୟାମ ମେହେର, ସୁମିତ ପ୍ରଧାନ ଓ ଶେ୍ୱତା ଦାଶ ପ୍ରମୁଖ ସହଯୋଗ କରିଥିଲେ।

ଆସନ୍ତାକାଲି ଉତ୍କଳଭାରତୀ କୁନ୍ତଳା କୁମାରୀ ସାବତଙ୍କ ଉପରେ ‘ଶେଫାଳିର ମହକ’, ୭ ତାରିଖରେ ଜ୍ଞାନତପସ୍ୱୀ ବିନୋଦ କାନୁନଗୋଙ୍କ ଜୀବନୀ ଆଧାରିତ ‘ଜ୍ଞାନତପସ୍ୱୀ’, ୮ ତାରିଖରେ ସ୍ୱାଧୀନତା ସଂଗ୍ରାମୀ ରାମାଦେବୀ ଚୌଧୁରୀଙ୍କ ଜୀବନୀ ଉପରେ ‘ରମାଦେବୀ’ ଏବଂ ୯ ତାରିଖରେ ଆଦିକବି ସାରଳା ଦାସଙ୍କ ଜୀବନୀ ଉପରେ ପର୍ଯ୍ୟବେଶିତ ‘ଆଦିକବି’ ପ୍ରଦର୍ଶିତ ହେବ।