ହଲିଉଡ୍ ଅଭିନେତାଙ୍କ ଚୁମ୍ବନ ମାମଲାରେ ଶିଳ୍ପା ସେଟ୍ଟୀ ନିର୍ଦ୍ଦୋଷ, ଅଦା‌ଲତ କହିଲେ ସେ ଅଶ୍ଳୀଳ ଆଚରଣ ଦେଖାଇନାହାନ୍ତି

ମୁମ୍ବାଇ: ହଲିଉଡ୍‌ ଅଭିନେତା ରିଚାର୍ଡ ଗେରେ ବଲିଉଡ୍‌ ଅଭିନେତ୍ରୀ ଶିଳ୍ପା ସେଟ୍ଟୀଙ୍କୁ ଏକ ସାର୍ବଜନୀନ କାର୍ଯ୍ୟକ୍ରମରେ ସଭାମଞ୍ଚ ଉପରେ ଚୁମ୍ବନ ଦେଇଥିବା ନେଇ ୨୦୦୭ ମସିହାରେ ହୋଇଥିବା ଅଶ୍ଳୀଳତା ମାମଲାରେ ଦୋଷମୁକ୍ତ ହୋଇଛନ୍ତି ଅଭିନେତ୍ରୀ ଶିଳ୍ପା। ମୁମ୍ବାଇର ଏକ ଅଦାଲତ କହିଛନ୍ତି ଯେ ସାର୍ବଜନୀନ ସ୍ଥଳରେ ଜଣେ ମହିଳା ଯଦି ଅଶାଳୀନ ଆଚରଣର ଶିକାର ହୁଅନ୍ତି ତେବେ ଉକ୍ତ ଘଟଣାରେ ତାଙ୍କୁ ପକ୍ଷଭୁକ୍ତ କରାଯାଇ ପାରିବ ନାହିଁ ଏବଂ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ପାରିବ ନାହିଁ।

ଏହି ମାମଲାରେ ଅଭିନେତ୍ରୀ ଶିଳ୍ପା ସେଟ୍ଟୀ ଚୁମ୍ବନ ଦେଇ ନଥିଲେ, ବରଂ ତାଙ୍କୁ ଚୁମ୍ବନ ଦିଆ ଯାଇଥିଲା। ଏହି ମାମଲାରେ ବଲିଉଡ୍‌ ଅଭିନେତ୍ରୀ ସେଟ୍ଟୀଙ୍କୁ ଦୋଷମୁକ୍ତ କରିବା ପାଇଁ ମାଜିଷ୍ଟ୍ରେଟ୍‌ ଅଦାଲତ ଦେଇଥିବା ଆଦେଶକୁ ବଜାୟ ରଖି ଅତିରିକ୍ତ ସେସନ୍‌ ଜଜ୍‌ ଏସ୍‌ ସି ଯାଦବ ଗତ ସପ୍ତାହରେ କହିଥିଲେ ଯେ ତାଙ୍କ ପକ୍ଷରୁ ଅଶ୍ଳୀଳତା ସ୍ପଷ୍ଟ ହୋଇନାହିଁ। ତେବେ, ଆଜି (ମଙ୍ଗଳବାର) ବିସ୍ତୃତ ରାୟ ଉପଲବ୍ଧ ହୋଇଛି।

୨୦୦୭ରେ ରାଜସ୍ଥାନରେ ଏକ ଏଡ୍‌ସ ସଚେତନତା କାର୍ଯ୍ୟକ୍ରମ ପାଇଁ ମଞ୍ଚରେ ଏକାଠି ହୋଇଥିବା ବେଳେ ହଲିଉଡ୍‌ ଅଭିନେତା ଗେରେ ବଲିଉଡ ଅଭିନେତ୍ରୀ ସେଟ୍ଟୀଙ୍କ ଗାଲରେ ଚୁମ୍ବନ ଦେଇଥିଲେ। ଏହି ଘଟଣାରେ ଆଇପିସିର ଧାରା ୨୯୨ ଅନୁଯାୟୀ ଅଶ୍ଳୀଳତା ଅଭିଯୋଗ ଆଣିବା ପାଇଁ ଅଭିଯୁକ୍ତ (ସେଟ୍ଟୀ)ଙ୍କ ବିରୋଧରେ ଯଥେଷ୍ଟ ପ୍ରମାଣ ରହିଛି ବୋଲି ଦରକାରୀ ପକ୍ଷ ଯୁକ୍ତି ବାଢ଼ିଥିଲେ। ସୂଚନା ପ୍ରଯୁକ୍ତି ବିଦ୍ୟା ଆଇନ ଏବଂ ମହିଳାଙ୍କ ଅଶ୍ଳୀଳ ପ୍ରତିନିଧିତ୍ୱ (ନିଷେଧ) ଆଇନର ବ୍ୟବସ୍ଥା ଅନୁଯାୟୀ ମାଜିଷ୍ଟ୍ରେଟ୍‌ଙ୍କ ଆଦେଶକୁ ରଦ୍ଦ କରିବାକୁ ପ୍ରାର୍ଥନା କରାଯାଇଥିଲା।

ତେବେ ଏହି ମାମଲାରେ ଉଭୟ ପକ୍ଷର ଶୁଣାଣି କରିବା ପରେ ଅଦାଲତ ଏପ୍ରିଲ ୩ ତାରିଖରେ କହିଥିଲେ, ଜଣେ ମହିଳାଙ୍କୁ ରାସ୍ତାରେ ଅସଦାଚରଣ କରାଯାଉଛି କିମ୍ବା ସାର୍ବଜନୀନ ସ୍ଥଳରେ କିମ୍ବା ସାର୍ବଜନୀନ ପରିବହନରେ ସ୍ପର୍ଶ କରାଯାଉଛି ତେବେ ତାଙ୍କୁ ଏହି ମାମଲାରେ ଅଭିଯୁକ୍ତ କିମ୍ବା ଅଂଶୀଦାର ବୋଲି କହାଯାଇପାରିବ ନାହିଁ ଏବଂ ତାଙ୍କୁ ମାମଲା ରୁଜୁ କରିବା ପାଇଁ ଅଟକ ରଖାଯାଇ ପାରିବ ନାହିଁ।

ଅଦାଲତ କହିଛନ୍ତି ଯେ ଶିଳ୍ପା ସେଟ୍ଟୀ ଚୁମ୍ବନ ଦେଇ ନଥିଲେ, ବରଂ ତାଙ୍କୁ ଚୁମ୍ବନ ଦିଆଯାଇଥିଲା। ତାଙ୍କ ତରଫରୁ ଅଶ୍ଳୀଳ ଆଚରଣ ହୋଇଥିବା ସ୍ପଷ୍ଟ ହୋଇନାହିଁ।